2011/08/30

صباحكم عيد


                            صباحكم عيد ... صباحكم سعيد :)

                                       كل عام وأنتم بخير

2011/08/22

فقير غلبان



وبتلخبط فى وسط زحمة الأيام
فيظهر نورك يمحى الضلمة والأحزان

وأفرح بس عشان عارفة فى غيرى كتير
ويمكن يعرفوك أكتر
لكنك جمبى تغفرلى
فأرجع تانى أكون فى أمان

وتحصل حاجة تثبتلى
بأنى مهما أتمنى
ففى المكتوب أكيد أحسن

وبعد أما أفهم الحكمة
تعلّمنى
بأنى حتى مهما وصلت
فبرضه هبقى فى وجودك
فقير غلبان

2011/08/11

سجين فى الطين



ولأن خيالك ممكن جدا يسرح بيك
ويصوّرلك أن أنت بثورة ممكن ترجع أراضيك
مش صح أسيبك لطموحك ... جايز يغريك
نختصر الوقت ... تنسحب أنت وتختارلك أى مكان تانى
أهو برضه يكون نوع من التغيير
.
.
.

أنا مصر مكانى وعنوانى
وأن ضاق الكون من حوليّه
هختارها وأعيش لو حتى سجين
وبحسبه بسيطه مهيش فارقة
عارف مش فجأة هكون فى السما
من بعد ما غوصت سنين فى الطين

2011/08/05

محتاجة أصدق




محتاجة أصدق فى اللى جاى
محتاجة أشوف بعينى بداية الطريق .... أنه قرب مش بعيد


محتاجة أحس بقرب ناس لسه عنى بيسئلوا
رغم المسافة والمشاغل و الظروف

محتاجة أرضى بس نفسى
حتى لو وصلنى ده أنى دايما أكون لوحدى

محتاجة أعيط ..... أضحك أو أصرخ ... أنفعل
أى رد فعل يحصل ، أبقى بيهم لسه كائن حى بأفرح و أنزعج
 
محتاجة حاجة تختلف عن شكل يومى وعن حياتى
أقوى بيها أنى أكمل
أنى أصدق فى اللى جاى