مش أنانى

 لما الكلام ما بينا يخلص يفضل ايه يوم نحكى فيه ؟؟؟

لما المراكب بينا ترسى يبقى ننسى مش هتفرق اى فرصة

لما الطريق يوصل ما بينا لحيطة سد ... سور ورافض اى هد .... يبقى ليه ؟؟؟

واما يبقى وجودى زيه زى عدمه خيال ويملى الكون عليك

لما يصبح حتى صدقى ... كمان صراحتى ( صوت سخافتى ) .... نكمل تانى ايه ؟؟؟

وبصراحة !؟ ... الصراحة مش كفاية انك تحس ..... الحكاية انك تبص ... تشوف وتسمع حد تانى ... حد غيرك .... حد عادى مش انانى

لما الكلام يخلص ما بينا ؟

للعملة وجهان

للعملة وجهان تماما كما للبشر ... وان كانت اوجه العملة واضحة ومعروفة فأوجه البشر لا تظهر الا اذا حدث ما يستدعى ظهورها

وبالتأكيد لا اعنى بكلامى ان هذا الوجه الآخر بالضرورة ان يكون الوجه الأسؤ ..... ولكن المقصود هو ان ما نراهم عليه ليس دائما هو الصحيح وما نتوقعه منهم ليس بالضرورة ما سيحدث

 ويرتبط هذا دائما فى ذهنى بعبارة للأستاذ عبد الوهاب مطاوع فى مقالة له بعنوان ( القيثارة ) عندما كان يتحدث عن حبه الشديد لعبد الوهاب الذى كاد ان يصل فى بعض الاحيان الى حد التعصب  ( علمتنى خبرة السنين الأعتدال فى مشاعر الحب والكراهية تجاه كل شئ فى الحياة فتحول تعصبى القديم لعبد الوهاب الى اعتزاز ناضج به يسمح لى بأن أعجب بما يستحق الأعجاب فيه وهو كثير ... وأن أضع كثيرا من الأمور فى نصابها الصحيح )  الأعتدال فى مشاعرنا هو ما اتحدث عنه بالتحديد

فلا يجب ان نحب شخص ما  لدرجة تصل الى التمجيد مما يجعلنا نضعه فى مكانة لا نتوقع معها الخطأ او التغيير .... ولا يصح ايضا ان نشعر بالكراهية المطلقة تجاه شخص آخر لسبب واحد او لموقف حدث وانتهى مما لا يجعلنا نتوقع منه الأفضل بل و نساعده عليه

الشئ الوحيد المتوقع انه ومع مرور العمر تختلف .... تتبدل المواقف ويتغيرالأشخاص فمن كان بالأمس لا يكون نفسه الآن ولن يكون هو فى المستقبل .

واحد زى كتير

_واحد من الشعب الكادح 

_ ( زيى كتيير ) 

_ طب ما انا عارف 

_ حتى ولو 
 ايه مشكلتك ؟
 خايف انى اضيف حاجة فوق اللى اتقال
وهضيف ايه !؟ 
 ما انا علشان اصلا اضيف لازم احكى من الاول 
 بص يا سيدى

_الكذب حرام 
  قصدك بس الكذب على مين
 علشان نقدر من أولها نكون واضحين 

_ ايه ( الرشوة ) 
 ملها الرشوة دى هيا كمان 
 باخد اكتر من اللى استاهله
 بتعب واشقى واخد حقى نظير خدماتى 

_ (استغلال ونفوذ ) براحة بس شوية عليه
اما اذا كان على الاستغلال استنى اتفرج على اللى يفوز
  ماهو مش ممكن زى ما قلت الشرير علطول بنفوذ .

_ايه فاضل ايه ؟؟
ايوه انا مشغول 
  ( الوطنية ) ميه الميه طبعا احنا اعظم  شعب واجدع ناس

_(قواضى فساد )
 كلها اشعات
 قصدك سرقه  مممم ايوه فهمت
 حدد بس هتسرق ايه وبكام ومنين ونبقى نقرر
 فعلا اذا كان دا حق الجماهير ولا دى مجرد تخاريف
كدا خلصت ؟؟؟

_ليه ال low وليه مش high 
 طبعا عارف الفرق ما بينهم موضة يا مان

_  مين ؟؟ بكينام
عادى يا مان انا عقلية محبش اخنق على اللى معايا

_مين بيغير ؟؟
 طب وانا مالى اقلد ليه وانا ليا استايلى واصلا بره الشله بتاعتى 

_ شغل يا مان
  بتقول شغل
اما انت يا مان جدى غريب 
 شغل ده ايه
اخلص بس القعدة الاول فى اى كافيه
ونبقى نشوف الشغل يا مان 

 _هعمل ايه ؟؟
 هخرج بقى مع دودو وسامح ... اه طبعا واكيد مع باكى
 قشطة يامان
سانكس جدى انك موجود
_طب ما تقول نروح الديسكو ولا النادى 
 نضرب ايه  !؟
لا يا مان كده انا ازعل
 يعنى وبعد ده كله بتسئل نضرب ايه ؟
قصدك فين وبكام ومنين .

_حقيقى يا مان نورت كتير بس دا بدرى
6 الصبح لا مش فاهم 
 اوعى تقولى قوم روح نام
عادى يا مان
عادى يا مان.

_قاعد عالقهوة بعمل ايه ؟
مستنى جواب التعييين 

_ واستناه ليه ؟
امال يعنى اعمل ايه ؟

_اللى بحبه !؟
واللى بحبه دا يطلع ايه ؟

_اى هوايه
 هجيب هوّاية تطرى القعده مع المشاريب
وبرضه اهى حاجة لحد ما احدد ايه اخرتها فى التعيين .

_واشمعنا يعنى التعيين ؟
 وظيفة حكومى واهو يجى معاها التأميين

_معاك استاذ 
 ايه مالك زعلان كده ليه
عادى بتحصل وايه العيب

_عيلة واستقرار 
 واللهى ما انا رادد
قوم قوم وانا احاسب على المشاريب .

فتش عن الهدوء

عندما يسود الزحام  وتشعر بأنه أصبح من الصعب ان تتغلب عليه ..... فتش عن الهدوء

بعد شقاء يوم طويل أستمتع بالباقى منه .... تناسى كل ما يشغل تفكيرك

بعد زحام التفكير...... استغرق الوقت فى الاستماع الى سكون الليل

بعد تزاحم المشاكل...... فتش فى داخلك عن اى ذكرى قديمة تخلق الأختلاف

بعد زحام من الأحداث .... أفعل شئ جديدا  يخرج عن المألوف والطبيعى

وسط تدافع الأيام وتضاءل الأوقات .....  بعد أى زحام .... فتش عن الهدوء

فالهدوء لا يعنى دائما السكون ... يكفى فقط أن تعرف معنى الصفاء والسلام لتعثر عليه

اكيد هتفرق

لما تلاقى حد جمبك
معاك وهمه يواسى همك

لما تعرف ان هو الشخص ذاته اللى دايما فى حساباته انت قبله
 واما يبقى فى اى حاجة شايفك انت اهم عنده

لما تسمع كلمة منه فى كل لحظة زهقت فيها
بعدت عنه

لما ثقته تبقى اكبر دعم ليك
مش علشان خاطر عنيك 
 ثقته فيك سببها حبه وامله فيك

واما تعيش وانت شايف اد ايه بيخاف عليك 
 اد ايه يفرق معاه لو يوم يعدى 
 فى لحظة يمشى وميلاقيش ايده فى ايديك

لما يكفى بس صوته عشان تحس بالأمان
عشان تحس بقربه منك
وانه سندك فى الحياة

اكيد هتفرق

برمج تفكيرك

وفقا لقانون التغيير المعروف فمن الطبيعى ان تتوقع ان ارائك الثابته لا وجود لها .... أو أن يصح دائما ما تفكر به مادام ذلك يحدث دون ربطه بالمسلمات المحيطة بك

برمج تفكيرك على ضرورة التغيير من فترة لاخرى فلا يوجد ثوابت واضحة لاى شخص او اى فكرة ..... الأفكار تتطور والمفاهيم تختلف والأشخاص تتغير

ولذلك فيجب ان تتتبع هذا التغيير .... حتى تستطيع ان تجيد الحكم ، فماهو صحيح وما هو خاطئ او زائف ....  خاضع للأختبار والتقدير ثم القرار ، وارائك هى ليست قيد التعميم مادام هناك من يعارضها

 فمن الأفضل دائما ان تكن أول من يستفهم !؟ ..... اخر من يبدى رايه أو يحكم

بحلم أكون

بحلم اكون انسانه  قوية ومش بسهولة ابوح ولا انوح

 بحلم اكون صورة لفنان
 يلمح فيها الناس الروح قبل العنوان

بحلم باليوم 
 يوم ما اقابل رب كريم
 بحلم اكون اثرت فى حد ولو حتى صديق

بحلم اعرف انفذ حاجه من غير اى حساب وبدون تفكير
اصل الدنيا مهيش محتاجة حد يسابق فى التاخير

بحلم اكون بلياتشو فى سيرك
 يضحك قد ما يقدر يضحك
 بس استنى وشوفه
 وقت الجد  يقلب ساحر لو حبيت

بحلم افرق بين المخلص والكذاب
واعرف ان الحب افعال مش بس كلام

بحلم اعيش حرة ومن غير معمل اى حساب للناس
 زى الطير ماهو طاير فوق من غير وسواس

بحلم اشيل حنية قلبى لوقت اوانها
 وده اذا كان لسه فاى مكان ناس بتقدرها

بحلم احس بدفا وامان وسلام
 من غير محتاج لوظيفة
او جاه
او حتى ان املك 100 فدان

بحلم انى اكون نفسى
بس مفيش حاجه مسعدانى 
 لسه كتير
 وده اذا كان فى وقت يكفى انى اعبر على اللى فى بالى

بحلم ودى احلام
 حتى وان مبقتش حقيقة
 يبقى حلمت
ومتهيالى ان الحلم لكل مواطن ولسه كمان مبقاش بفلوس ولا حتى نفوذ

(بحلم اكون )