على قبرى

على قبرى فى صوت قرآن

 وشيخ يدعيللى بالرحمة وبالغفران

ودمعة بحرقة  من ناس لا بعرفها ولا تعرفنى

لكن ممكن يكون المشهد الحالى

بيسترجع فى وجدانهم حقيقة كل شئ فانى

ومنهم اللى من جواه ميفرقش خسراتى معاه
واهو واجب وبجميلة

وقليل منهم هيحلم حتى بدقيقة

عشان وقت اما يحتاجلى

ميبقاش منى غير شاهد

فى كل زيارة

 على قبرى

من غير هتافات

من حقى أنام بالليل مهموم
أزهق فيبان أن أنا مخنوق
من حقى أعيش لحظة ضعفى من غير هتافات
أغلط ... أندم
أصعب على نفسى كمان
من حقى سعات أقلبها جنان
وأقرر أعيش من غير أحلام
أو حتى أقول وبكل شجاعة أنا حد جبان
من حقى بأضاءة خفيفة وستار مسدول
أعتبر المسرح مقفول
من حقى
ومن حقك برضه
متشفش لرأى ده أى لزوم .

أفتقدك

بدونك تعترينى رغبة قوية فى أن أتمدد فى وضع  جنينى على أرض ثابتة .. أرض تمنحنى من البرودة  ما يعادل الألم بداخلى وتعيد لى من الثبات ما يعيننى على الصمود ولو دقائق دون ترنح .

بدونك يتخلى عنى كل يوم جزء من كيانى .. من حديثى ..  من سكونى وكأنى أدركت فجأة كل درس محتمل أن تلقنى إياه الحياة .

لم أعد أنتمى إليهم  ،لا شئ يجمعنا مهما حاولوا ستبقى كفتك هى الأرجح ، رفقتهم تزيد همومى .. أحاديثهم تحثنى على السخرية .

أعتدت أن أقرا أن للفراق هيبة كالموت ، ولكننى لم أتخيل أن ذكراه ستتجسد كشبح يترائى لى كلما أوشكت أن أتخطاك إلى عالم جديد أستعيد فيه نفسى ، عالم يتناغم كل مافيه ليعطى لحن مبهج عوضا عن الضوضاء والرهبة .

أفتقدك إلى حد يشبهنى لحبات رمل يشتتها الريح طالما لا تدفئها راحتيك.

يفتقدك بريق عينى الذى ما كان ليخطئ طريقه إليك  .. وليس وحده من لم يعد يعرف إتجاهه .

أعتدت وجودك هنا وتناسيت كيف يكون اللجوء لذاتى .

ماسبق نص رسالة لا تنتهى سطورها ولا أملك من الأرادة ما يهزم ضعفى ويطويها .

أفتقدك

نقاش

فى أحدى مناقشات وقت الفراغ ... كان فى سؤال مضايقنى جدا وكان نفسى أعرف أنا لوحدى اللى كده ولا إيه !؟

والسؤال كالتالى :

هو فعلا فى فرق ما بين أنك تهتم ، وأن الأهتمام ده يبقى ليه معنى أصلا 

بخرف أنا هه ... بس بجد والله فى فرق.

يعنى انت لو روحت لحد مضايق يبقى أحسن لو سمعته ولا لو حلتله مشكلته طبعا الجواب المنطقى لو حلتله مشكلته ، هو ده بقه اللى أنا بتكلم فيه مش دايما على فكرة .

يعنى أنت ممكن تقابل واحد هيتفلق من الضحك وأنتى جمبه سايب كل حاجة ومركز هو بيضحك ليه مع أنه ممكن يكون هو نفسه مش عارف ليه ؟؟ بس كل اللى محتاجه أنك تتهبل معاه وخلاص .

الخلاصة مش دايما لما هتهتم الأهتمام ده هيظهر حبك ولا دايما برضه  هيبقى لازم تهتم أصلا .

أحيانا كتيير بتبقى الأجابة أسهل مما نتخيل بس أحنا بنحب نجعلصها ... لو أنتوا من عشاق فيلم أحلى الأوقات زى هتعرفوا  أيه الفرق ما بين الورد والكباب وأكيد الورد يكسب ;)

لما تلاقى حد زعلان خده فى حضنك ، ولو فى موجة ضحك هستيرى أضحك على ضحكه

الحضن هيديك أكتر ما هيديه .... والتهيييس هيغير مودك حتى ولو للحظات

أهتم بس وأنت فاهم دماغ اللى قدامك كويس ، لأنك أوقات كتيييير جدا ممكن تضيع وقتك على الكباب وهما كل اللى محتاجينه وردة واحدة 

:)

موسيقى ..

“من المؤسف أن خاصية الموسيقى التصويرية لا تتوفر إلا في السينما فقط .. فحياة المرء تتحدد حسب الموسيقى التصويرية التي تنساب كخلفية له .. كوميدية ؟ درامية ؟ .. لو علم الناس ماهية موسيقاهم التصويرية لارتاحوا منذ زمن !” 

― أحمد صبري غباشي

خلص الحداد

خلص الحداد

أيوه كل واحد فينا قفل على اللى فات

كل واحد فينا اختار طريقه وقال سلام

كان حبيبى

وكان صديقى

كانلى أحلى الذكريات

كان وكان

قلت لأ !؟

لأ مقلتش

فى طريق البعد خطوة لابد فيها من الفراق

حتى لو قررت ترجع وتعيد تانى المحاولة

برضه عمر الأختيار ما يكون فى أيديك

لازم الأول رفيقك يبقى قد الأنتظار

كانت أحلامى بسيطة

حتى عمرى ماكنت عايزه زى كل الناس ما تحلم فستان أبيض وطرحة ،

كل ما تمنيت فى يوم أنى أصحى أحس بس بقربه جمبى

وأنى مش محتاجة أخاف أو حتى أشك فى حبه ليا وهو قلبى

كنت أنام وأنا نفسى أحلم بيه ليوم ما هشوفه تانى

كان كلامنا يدوب ثوانى وإن شافوه الناس ساعات

وأبقى ناسية أى حاجة وكل حاجة لما بس بكون معاه

حتى لو مضايقة أفرح

وأن كشفنى بخفة بضحك وأقوله أنسى

بكره جى هيبقى أحلى من اللى فات

وبكره جه

دار كلام كتير مابينا

والسكوت كان بس فاصل لما جت كلمة فراق

، جت وبسهولة وبساطة يمكن أسهل من بحبك

وقتها كان القرار

حتى وأن كان مرار

بس عمرى فى يوم ما أوافق ابقى رهن الأختيار

لسه مجاش

قبلى فى ناس هيكونوا بدالى

وهتبتسمى وهتتكسفى

وهتفتكرى أن أنتى خلاص

آخر صبرك كان بلقاهم

لسه مجتش

ولسه هقابلك وتحبينى

 أول يوم من عمرى وعمرك

كان مكتوب

ان ابقى نصيبك

وتبقى الضلع الأعوج فيا

أستنينى

قوى ثقتى فى أنى هقابلك

ردى عليهم

( صوت جوايا  لسه مصدق

اللى هحس معاه بأمان

لسه رب الكون مأذنش أنى أقابله

لسه مجاش )