ميكرفون

شغل ميكرفون قلبك
علّى الصوت عالآخر
أسمع
كأنك أول مرة تعرف
حس 
بقلب شاف كتير ثم انطفى
واكتب الناتج من كل دول فى كلام
اقرا
تلاقى الدنيا اوضح
شوفه
لكن بعين عرفت ايه اللى جاى قدام
يجوز تكون أسعد كتير .. أبعد هناك
بره الزمان
ناتج حياتك تفهمه .. لو بس تفتح ميكرفونك للحياة

أوهام .

بتخاف؟
من تأثير الواقع فيك
من صوت عالى مكتوم فسكوت
من حدوتة قديمة فقلبك
من وحدة لو جت قبل الموت

بتخاف ليبان أنك خايف

من تزوير الناس لحقيقتك
من نور الدنيا أما يضلم
من أضغاث أحلام بتطاردك
من التوهة فقلب زحام الكون

بتخاف لتصدق نفسك
أحسن بعدين ترجع ندمان
خايف من خطوة لقدام

كلها أوهام

تصميم

فرق القدرة ما بين الاول والتانى

مش دايما بيكون فرق كبير

فرق حياتك بين قبل وبعد 

 جايز أو جد

فرق الترتيب بين آخر لقطة عن بدايتها

ملهوش تأثير
كل القصة

فرق التصميم

بين كونه أختار يبقى الأول بدل التانى

أخترت تشوف مشهد كامل

ولا تشوف من الآخر
 وتجيب بعدين أنت التفاصيل

أخترت تكمل فى حياتك

 ولا هيهزمك التغيير

جوه زحمة

أرمى نفسك جوه زحمة
جوه ضحك الناس
أو حتى جوه مناقشة حادة
أنسى الكلام جواك

حط قلبك جوه غنوة
دندن
مش شرط نفس المقام

نَسّى نفسك كل حاجة
وأفتكرها ( هى ) بس
( هى ) أى حاجة حلوة فى الحياة
شغلك ... حبيبتك .. أهلك ... هوايتك 

أنسى نفسك
وفكر فى كل الناس

غيظ بضحكة
 هم شايفك
قوله ده مش أسلوب حياة :)

أرمى نفسك جوه أوضه
ضيق أوى عليك المكان
وأرجع دور عالبراح
جوه حاجة خنقاك

كون زى ما تحب
لو حتى كنت ده جواك

أرمى نفسك جوه قلبك
طبطب عليه أوى
قوله آسف .. أحيانا مضطر أكون أنسان

سكة سالكة

زهقت من كتر الكلام عن صفحة واحدة

 من كتاب داب ورقه كله 

مالكتابة فيه بحبر الاتهام

يمكن فقدت  خلاص معاكم روح المثابرة والأهتمام

وبدون عتاب
 ما هو انتو برضه يصح فيكو

زى ما أتقال زمان

لو تعاتب ندل يوم 

يبقى عتابه الأجتناب

صدقونى مش انتو بس الغلطانين 

علشان تكونو مرتاحين

يمكن انا اللى ببيع رخيص

وبضحى بال بعد كل حاجة قالها

 او عملها وجت عليا

لسه برضه فى أعتقاده الشخصى عنى

انى أنا اللى بقيت خسيس

وكمان عشانكم 

لأكتمال الفكرة يعنى

شهامة منى

أى شخص من النهاردة

ناوى يفضل مستفز

أو مصدق نفسه خالص

فترة ضيافتكم فى قلبى
طولت جدا وباخت 

بالسلامة  

السكة سالكة 

والحساب واصل و خالص

خفت أحبك !؟

لما جيتلى وقولتلى انسى الزمان

انسى كل الناس معايا

انسى المكان 

 وافتكرى بس حبى اللى كان

معرفش ليه مفهمتهاش !؟ 

 معرفش ليه خدت القرار ومقلتهاش

 (بحبك)

ولاّ يمكن قلتها ومسمعتهاش ؟

أيوه خفت انى أحبك

 خفت أتوه وأحلم معاك

خفت أنسى الكون بحاله

 رهن بس أكون هواك

خفت دايما من القرار

خفت أخاف من الأختيار

مش خوف ده منك او عليك

 ده خوف عليا

لحظة فراق يسألنى قلبى عن عنيك

ومهما ترجع تانى تسأل عن أمل أو حتى فرصة

بحس منك شوق ولهفة

بحس ليه بالأنتظار !؟

مع أنى دايما كنت خايفة  

خفت أحبك

خفت أخد القرار

على قبرى

على قبرى فى صوت قرآن

 وشيخ يدعيللى بالرحمة وبالغفران

ودمعة بحرقة  من ناس لا بعرفها ولا تعرفنى

لكن ممكن يكون المشهد الحالى

بيسترجع فى وجدانهم حقيقة كل شئ فانى

ومنهم اللى من جواه ميفرقش خسراتى معاه
واهو واجب وبجميلة

وقليل منهم هيحلم حتى بدقيقة

عشان وقت اما يحتاجلى

ميبقاش منى غير شاهد

فى كل زيارة

 على قبرى

من غير هتافات

من حقى أنام بالليل مهموم
أزهق فيبان أن أنا مخنوق
من حقى أعيش لحظة ضعفى من غير هتافات
أغلط ... أندم
أصعب على نفسى كمان
من حقى سعات أقلبها جنان
وأقرر أعيش من غير أحلام
أو حتى أقول وبكل شجاعة أنا حد جبان
من حقى بأضاءة خفيفة وستار مسدول
أعتبر المسرح مقفول
من حقى
ومن حقك برضه
متشفش لرأى ده أى لزوم .

خلص الحداد

خلص الحداد

أيوه كل واحد فينا قفل على اللى فات

كل واحد فينا اختار طريقه وقال سلام

كان حبيبى

وكان صديقى

كانلى أحلى الذكريات

كان وكان

قلت لأ !؟

لأ مقلتش

فى طريق البعد خطوة لابد فيها من الفراق

حتى لو قررت ترجع وتعيد تانى المحاولة

برضه عمر الأختيار ما يكون فى أيديك

لازم الأول رفيقك يبقى قد الأنتظار

كانت أحلامى بسيطة

حتى عمرى ماكنت عايزه زى كل الناس ما تحلم فستان أبيض وطرحة ،

كل ما تمنيت فى يوم أنى أصحى أحس بس بقربه جمبى

وأنى مش محتاجة أخاف أو حتى أشك فى حبه ليا وهو قلبى

كنت أنام وأنا نفسى أحلم بيه ليوم ما هشوفه تانى

كان كلامنا يدوب ثوانى وإن شافوه الناس ساعات

وأبقى ناسية أى حاجة وكل حاجة لما بس بكون معاه

حتى لو مضايقة أفرح

وأن كشفنى بخفة بضحك وأقوله أنسى

بكره جى هيبقى أحلى من اللى فات

وبكره جه

دار كلام كتير مابينا

والسكوت كان بس فاصل لما جت كلمة فراق

، جت وبسهولة وبساطة يمكن أسهل من بحبك

وقتها كان القرار

حتى وأن كان مرار

بس عمرى فى يوم ما أوافق ابقى رهن الأختيار

لسه مجاش

قبلى فى ناس هيكونوا بدالى

وهتبتسمى وهتتكسفى

وهتفتكرى أن أنتى خلاص

آخر صبرك كان بلقاهم

لسه مجتش

ولسه هقابلك وتحبينى

 أول يوم من عمرى وعمرك

كان مكتوب

ان ابقى نصيبك

وتبقى الضلع الأعوج فيا

أستنينى

قوى ثقتى فى أنى هقابلك

ردى عليهم

( صوت جوايا  لسه مصدق

اللى هحس معاه بأمان

لسه رب الكون مأذنش أنى أقابله

لسه مجاش )

شبابيك

من شباك اودتى :

_فى نسمة صيف

 والشمس بتشرق مبتغربش

_السما بتبان

براح بيساعك مبيخنقش

_الدنيا تهون

لو قاسية وظالمة

 دا مبيفرقش

 والناس بتسامح مبتغدرش

_بشوف شبابيك

 بتدارى السر ومبتفضحش

 وهناك كروان

بيناجى الخالق (عز وجل ) مبيسكتش

_ الليل بيطول

 وفى ليله بتوه

 بنسى الاحداث واسرح فى سلام مبيتبددش

أقرب إنسان

انا شخصية بسيطة صريحه

نفسى اعيش جمبك فى امان

نفسى تكون فى حياتى بداية

 ونفسى منمش من السرحان

صحيح عصبية

بس معاك بهدى وبرتاح

وممكن ابقى سعات نكدية

يوم ما تكون قاسى وجراح

واعرف امتى افتحلك قلبى

 وامتى يكون العقل سلاح

غبيه وجهله

يوم ما تحب تكون استاذ ،

وحتى كمان انفع محامية تدافع عنك ليل ونهار

وساعة الجد ابقى صديقك اللى يساعدك فى المشوار

ويوم ماتحس بخوف او غدر هفضل جمبك

 بس اوعدنى

 تفضل صابر مهما يكون

 وانك تؤمن ان الدنيا كتيييير مابتاخد

 لكن لازم يوم راح تدى ومهما يكون

انا انسانه بفكر دايما فى المستقبل

علشان لازم قبل ماتعمل تعرف فين وازاى ومنين

وده معناه ان انا بشتاقلك من غير حتى ما انت تغيب

بخاف من الدنيا واعمل لها لو 1000حساب

علشان عارفه انها لو تغدر ربك وحده هو العالم امتى تروق

ويمكن دا اللى مخلينى اشوف الاسود قبل الابيض فى الاشياء

حاجه غريبه مع انها كلها الوان

احب احس بلأستقلال

يعنى تسيبلى مساحه اتكلم حتى وان كان اى كلام ،

قدر كده لو مره مشاعرى وشوفنى هرد عليك ازاى

احبك تفهم كل حلاتى

 وتعرف امتى بكون فرحانه

 وليه زعلانه

وايه اللى شاغلنى

يبقى سكوتى لغة وكلام انت وبس اللى بتقراه

ابقى معاك مع نفسى واكتر وابقى مش محتاجه ابرر

انا شخصية بحبك جدا

علشان كده افرح طبعا لما يقولوا جاتله خلاص

جاتله اللى هتغنيه عن حوا واللى هتقلب حاله كمان

جاتله اللى تخليه يتحرك

يطلب قربها ويرقيها

وزى ما تبقى حبيبه وزوجه

تبقى اليه اقرب انسان