مبقاش بعيد

مبقاش بعيد
تبقى واحد من اللى ماتوا
وأعلنوا عليه الحداد
مبقاش بعيد
يقبلوا فيك التعازى
... وأنت دمك لسه سايل
على الكراسى
مبقاش بعيد
ومش فارق
فى حالك
بلطجى ثاير
مبقاش بعيد
دمك يساوى تعويضات
ولجنة لتقصى الحقايق
فى أنتظار الأثباتات

.

.

.

قبل ما تنزل

حضر ورقة

وأكتب فيها

سلام لأخواتك

طيب خاطر أولادك

هون فيها الصدمة لأمك

كلم كل أصحابك حتى

قبل ما تنزل

حضر كفنك

وأكتب عنوانك عالدفنة

قبل ما تنزل

أصبر لحظة

ودع نفسك

وأقرا الفاتحة

بساطة حلم

مبقتش عارف أخاف من بكرة ولاّ أفرح
ولو هفرح .. تدوم فرحة فى قلبى أزاى وأنا فى حضنك بنام خايف من الحارس
شايل روحى على كفى
وكل سلاحى حلم بسيط ، بأخد التار لدم شهيد وفجر جديد يرجع الأمل تانى
.
.
بخاف تبقى قساوة القلب دى فيكى ... لكن أزاى ، ومن أمتى !؟
عشان يجمعنا صوت واحد لازم يرضى عليه ملايين
ودول قلة
وفى ساكتيين
وناس عايزة الأمان وخلاص ويولع اللى مش عايزيين
.
.
بنتقسم عشان مين !؟
ولما نعادى ونظلم بعض بنبنى مصر تانى لمين !؟
نعيد الثورة من تانى ولو حكمت نعيد تالت
ومش خايف من التكرار
مدام لسه بنخون بعض وبنهرب من مشاكلنا ونتجمل فى إعلام نوصفه بالحُر
.
.
نعيد تانى بشرط
يعلمنا اللى فات أكتر ... يفهمنا ضرورة التغيير

سجين فى الطين

ولأن خيالك ممكن جدا يسرح بيك
ويصوّرلك أن أنت بثورة ممكن ترجع أراضيك
مش صح أسيبك لطموحك ... جايز يغريك
نختصر الوقت ... تنسحب أنت وتختارلك أى مكان تانى
أهو برضه يكون نوع من التغيير
.
.
.

أنا مصر مكانى وعنوانى
وأن ضاق الكون من حوليّه
هختارها وأعيش لو حتى سجين
وبحسبه بسيطه مهيش فارقة
عارف مش فجأة هكون فى السما
من بعد ما غوصت سنين فى الطين

كلام مش فى السياسة

التدوينة دى أتكتبت  بتاريخ Wednesday, May 25, 2011  بعنوان ثورات العشرين

مميزات ثورة 25 يناير

 _ جعلت كل مواطن يكتشف وفجاة انه مصرى .. فهو لا ينتمى الى اى  جماعة أخوانية سلفية متطرفة أو علمانية ملحدة ... هو مصرى

_ أسهل واسرع الطرق لتهدئة الفتنة بين المسلمين والأقباط أقناعهم بأننا نعيش على أرض واحدة ونتغنى بنفس الأ غانى الوطنية .... وده طبعا على اساس انهم مش واخدين بالهم

_ ظهور كبير وجديد وساحق لكثير من المواهب الشابة التى تهنئ الثوار وتعزى أهالى الشهداء بشكل جعلنى اتسائل ... هيا الوطنية دى كلها كانت فين

_ أتاحة كثير من فرص العمل للشباب فى ظل الأزمة الأقتصادية وحالة التقشف التى تعيشها البلد بظهور مجموعة قنوات الثورة (التحرير _25 _ والثوار ..... الخ ) وهذا فضلا عن روتانا التى أكتشفت قيمة المصريين لتتحمل عبأ قناة خاصة بهم ... روتانا مصرية

_الشعب يريد ... حسنى يريد ... الله يفعل ما يريد

_ الشعور بقيمة وأهمية أمهات مصر فى صنع هذا الجيل العظيم والذى يتجلى بوضوح فى أعلان روابى الجديد .... وده بغض النظر عن انه عاجبنى

_ وجود أختلاف وتغيير كلى للشعب المصرى بحيث أصبح نصف الشعب ( بيبلتج ) على النصف الآخر ، والنصف الآخر يقنع ويبرر للنصف الأول اهمية الأقتناع بوجهات نظروا

_ أحتلت الأخبار السياسية والكتب الأستراتيجية والتاريخية السياسية المرتبة الاولى من أهتماماتنا بدلا من ( playstation ) وأخبار الموضة
أصبحنا نتابع أخر أخبار صفحة كلنا خالد سعيد وننتمى مسبقا لأى حزب لم يؤسس بعد بشرط ان يكون تابع للثورة

 _ سؤال كان يلح بشدة على ذهنى منذ أن أنتهت الثورة ... ( لماذا ) يرهق مصطفى بكرى نفسه بكل هذه المستندات التى يتبرع بها ليعرضها على النائب العام  ( هو مفيش حد غيره عنده مستندات ولا ايه !؟ ) الى ان قرأت الخبر التالى  .... طلعت السادات يتقدم ببلاغ ضد مصطفى بكرى يتهمه فيه بالكسب غير المشروع والتربح بالمال العام ... الحمدلله فى حد تانى بيقدم بلاغات

_ أضيف مصطلح جديد الى أحاديثنا المصرية المعتادة وهو ( ده كان قبل 25 ) ... وده طبعا كان قبل 27

ولا يوجد أكثر من المميزات التى خلفتها ثورة 25 يناير ولذلك فقد قرر البعض ( وعلشان مفتيش ) لا أعلم القليل أم الكثير الأندفاع خلف ثورة ثانية ولازلت لا أعلم
_أهو  للدفاع عن مطالب الثورة السابقة
_أم للأعتراض على ما لم تنجزه الثورة السابقة
_ولا هو نزول وخلاص

أنا لا أقصد الأهانة ولكنه تعجب من قدرة هذا الشعب على خلق اى سبب جديد من لا جديد والأصرار على استنفاذ آخر ما تبقى لنا من طاقة أقتصادية ونفسية

فى أنتظار ما يمكن ان تضيفه لنا الثورة الجديدة 27

أعلان وفاة

 الأسم :عم سيد

عم سيد اسم فردى لشخص عادى
 شخص بعرفه من بلادى

عم سيد اصله طيب  
حد كده من اللى فضلوا سنين يقولوا مصر هيا اهم شئ 
 المهم تكون بخير

حد كان مؤمن بمبدأ  مهما طال الضلمة نور 
 حاجة يعنى قصده تشبه انتظاره للشروق

واما خدتي اللى كان فى الأصل حقك
علشان يثبت قد ايه من قلبه حبك
 سهر معاهم بره يهتف
 (مصر شافت النهار جابت تانى انتصار )

عم سيد صبره ويا حسن ظنه هما عيبه 
 كان يفكر ان ضغطه وضعف قلبه سببه همه وفقر جيبه
 مكنش يعرف ان ضغطه وضعف قلبه
 كان لهمه او لغيره 
 ضمنه ضمنه 
 بنهب خيره

كان يعيب على اللى سافر واللى هاجر
 " خلى طمعه هناك يدينه 
 فاكر هينجح !؟
خليه يروح 
من وسط ميت مليون مهاجر  فاكر بسفره هيداوى الجروح
خليه يسافر
 خليه يروح "

عم سيد مات يامصر

مات وهوا بيبتسم
مات بفرحة عام جديد 
 عام سعيد
مات بيدعى لكل واحد خير يزيد

مع أنه ميت من زمان
عم سيد مات يامصر
مات زمان من الأنهزام

وأعذرونى ان كنت طولت الكلام 
 والعزاء قاصر وبس لكل مصرى
 لكل من امن بمبدأ عم سيد

واحد زى كتير

_واحد من الشعب الكادح 

_ ( زيى كتيير ) 

_ طب ما انا عارف 

_ حتى ولو 
 ايه مشكلتك ؟
 خايف انى اضيف حاجة فوق اللى اتقال
وهضيف ايه !؟ 
 ما انا علشان اصلا اضيف لازم احكى من الاول 
 بص يا سيدى

_الكذب حرام 
  قصدك بس الكذب على مين
 علشان نقدر من أولها نكون واضحين 

_ ايه ( الرشوة ) 
 ملها الرشوة دى هيا كمان 
 باخد اكتر من اللى استاهله
 بتعب واشقى واخد حقى نظير خدماتى 

_ (استغلال ونفوذ ) براحة بس شوية عليه
اما اذا كان على الاستغلال استنى اتفرج على اللى يفوز
  ماهو مش ممكن زى ما قلت الشرير علطول بنفوذ .

_ايه فاضل ايه ؟؟
ايوه انا مشغول 
  ( الوطنية ) ميه الميه طبعا احنا اعظم  شعب واجدع ناس

_(قواضى فساد )
 كلها اشعات
 قصدك سرقه  مممم ايوه فهمت
 حدد بس هتسرق ايه وبكام ومنين ونبقى نقرر
 فعلا اذا كان دا حق الجماهير ولا دى مجرد تخاريف
كدا خلصت ؟؟؟

_ليه ال low وليه مش high 
 طبعا عارف الفرق ما بينهم موضة يا مان

_  مين ؟؟ بكينام
عادى يا مان انا عقلية محبش اخنق على اللى معايا

_مين بيغير ؟؟
 طب وانا مالى اقلد ليه وانا ليا استايلى واصلا بره الشله بتاعتى 

_ شغل يا مان
  بتقول شغل
اما انت يا مان جدى غريب 
 شغل ده ايه
اخلص بس القعدة الاول فى اى كافيه
ونبقى نشوف الشغل يا مان 

 _هعمل ايه ؟؟
 هخرج بقى مع دودو وسامح ... اه طبعا واكيد مع باكى
 قشطة يامان
سانكس جدى انك موجود
_طب ما تقول نروح الديسكو ولا النادى 
 نضرب ايه  !؟
لا يا مان كده انا ازعل
 يعنى وبعد ده كله بتسئل نضرب ايه ؟
قصدك فين وبكام ومنين .

_حقيقى يا مان نورت كتير بس دا بدرى
6 الصبح لا مش فاهم 
 اوعى تقولى قوم روح نام
عادى يا مان
عادى يا مان.

_قاعد عالقهوة بعمل ايه ؟
مستنى جواب التعييين 

_ واستناه ليه ؟
امال يعنى اعمل ايه ؟

_اللى بحبه !؟
واللى بحبه دا يطلع ايه ؟

_اى هوايه
 هجيب هوّاية تطرى القعده مع المشاريب
وبرضه اهى حاجة لحد ما احدد ايه اخرتها فى التعيين .

_واشمعنا يعنى التعيين ؟
 وظيفة حكومى واهو يجى معاها التأميين

_معاك استاذ 
 ايه مالك زعلان كده ليه
عادى بتحصل وايه العيب

_عيلة واستقرار 
 واللهى ما انا رادد
قوم قوم وانا احاسب على المشاريب .

مصرى وأفتخر

لكل من أفنى عمره فى دراسة تاريخ شعب مصر الأوفياء 
 أقول :  أبدا لن تكون كرؤيا عينى من كفاح الأبرياء

  للمرة الأولى يا بلادى أكتب فخرا لكونى مصريا يعتز بالأنتصار
 للمرة الأولى يا بلادى أخجل من كونى مستسلما .. سلمىّ الأختيار
 للمرة الأولى يا بلادى  أقدر شعورى بالأمان والأمتنان 
 أفهم انه أحيانا للصبر أسباب
 أفتقد حتى صوت الزحام

وهذه البداية يا بلادى
هذا التاريخ يبدأ عامى الجديد
الهجرى منه والميلادى
 عام التفائل والأرادة
عام بأذن الله يمضى وينتهى مثل البداية عام سعيد

سيغير التاريخ من معنى العروبة والأنقسام
سيغير التاريخ أيضا مفهوم العزة 
 المحبة و الأنتماء

سيحاسب التاريخ كل من يخطئ
يدنس 
 يستفيد من الهدوء ومن الأمان
سيحاسب التاريخ كل من ضلل وأخفى 
 كل من سرق وأستهان

الآن يا بلادى سأكون مصريا جديدا يستحق الأنتماء
سأساندك فى كل محنة 
 وأعاهدك دوما ستبقى فى صفوف الأنقياء
سأفتش عن كل ما تعنى السياسة والثقافة والسلام
سأزيد من معرفتى حتى لا يقول البعض عنى شعب يحترف الكلام
  
لن تعودى يا مصر يوما للفساد
لن تضيع دماء من ضحوا هباء
لن اوافق ان أعايش الأنهزام